Вилояти СЕМИПАЛАТИНСК

СЕМИПАЛАТИНСК, вилоятест дар ҳайати Республикаи Советӣ Сотсиалистии Қазоқистон (аз 14 октябр 1939). Масоҳаташ 179,6 ҳазор км². Аҳолиш 796 ҳазор нафар (1984). Дер шаҳрҳо 50% аҳолӣ истиқомат мекунанд. 3 шаҳр, 14 райони маъмурӣ дорад. Марказаш шаҳри Семипалатинск. Қисми зиёди ҳудуди Семипалатинскро талистони Қазоқистон ишғол кардааст. Дар ҷануби шарқи вилоят қаторкӯҳи Тарбағатой воқеъ гардидааст. Ҳарорати миёнаи январ аз — 13⁰С то — 17⁰С, июл 20— 24⁰С. Боришоти солона 156—300 мм. Дарёи калонаш Иртиш. Кӯлҳои калонтарин: Зайсен ва Сассиқкӯл. Соҳаҳои муҳими саноаташ: саноати хӯрокворӣ, сабук, коркарди металл, истихроҷи маъдан, чӯбкорӣ. Гӯсфандпарварӣ асоси чорводорист. Гандуми баҳорӣ, ҷав, ҷуворимакка, зироати хӯроки чорво, офтобпараст, картошка ва сабзавот кишт мекунанд. Иртиш киштигард аст. Вилоят бо ордени Ленин мукофотонида шудааст (1967).