«Назарияи умумии системаҳо», таълимоти махсуси илмӣ ва мантиқию методологиест, ки биологи австриягӣ Л. Берталанфи (1901— 1976) пешниҳод кардааст. Мақсади асосии «Назарияи умумии системаҳо» коркарди мафҳумҳоест, ки барои чун система таҳлил кардани объектҳо имкон медиҳанд. Ба ақидаи Берталанфи «Назарияи умумии системаҳо» бояд он тағйироти ҷиддиеро, ки дар системаи мафҳумҳои илмӣ дар арзи асри 20 ба вуҷуд омадааст, инъикос намояд. Ҷиҳатҳои хоси илми муосир инҳоанд: 1) мавзӯи тадқиқоти илмӣ ташкилот аст; 2) барои ин мавзуъро таҳлил кардан роҳҳои ҳалли проблемаҳоеро ёфтан даркор аст, ки тағйирёбандаҳои бисёре доранд; 3) бар хилофи таъбири механистии табиат олам ҳамчун маҷмӯи соҳаю савияҳои гуногуни воқеият тасвир меёбад, ки алоқаи ботиниашон дар монандии қонунҳои дар онҳо амалкунанда зоҳир мешавад; 4) таълимоти редуксионизми физикалистӣ ҷои худро ба ғояи перспективизм медиҳад, ки имконпазир -будани ташаккули илми ягонаро дар заминаи изоморфизми қонунҳои соҳаҳои гуногун талқин мекунад. Душвориҳое, ки дар зимни татбиқи Назарияи умумии системаҳо ба амал омаданд, зарурати боздиди назар кардани як қатор принсипҳои аввалаи онро пеш оварданд. Ин буд, ки солҳои 60 вариантҳои дигари назарияи системаҳо (М. Месарович, Л. Зода, Р. Акофф ва ғайраҳо) пайдо шуданд, ки аз таълимоти Берталанфи фарқ мекарданд (чи аз ҷиҳати мазмун ва чи шакл, аз ҷумла аз ҷихати истифодаи аппарати математикӣ ва мантқӣ).
Охири солҳои 60 — ибтидои 70 худи Берталанфи ҳам баъзе нуқтаҳои ақидаи аввалаашро тағйир дода, мафҳумҳои асосии Назарияи умумии системаҳоро дақиқтарар қаламдод кард. Дар тули даҳ соли охир дар роҳи татбиқи амалии «Назарияи умумии системаҳо» иқдоми судбахше анҷом дода шуд (чунончи, дар биология, системотехника, забоншиносӣ ва ғайра). Ғояҳое, ки дар « Назарияи умумии системаҳо » баён ёфтаанд, аз тарафи як қатор муҳаққирони советӣ (В. Н. Садовский, М. И. Сетров, К. М. Хайлов, Э. Г. Юдин) инкишоф дода шудаанд.
Ад.: Лекторский В. А., Садовский В. Н., О принтсипах исследования систем, «Вопросы философии», I960, № 8; Сетров М. И., Значение общей теории систем Л. Берталанфи для биологии, дар кит.: Философские проблемы современной биологии. М.—Л., 1966; Садовский В. Н.. Основания общей теории систем. М., 1975.