Нахимов Павел Степанович (5. 7. 1802, ҳозира деҳаи Нахимови райони Андрееви вилояти Смоленск —12. 7.1855, Севастопол), лашкаркаши флоти рус, адмирал (1855). Яке аз роҳбарони мудофиаи Севастопол (1854—55).
Аз оилаи офисер. Корпуси кадетии баҳриро хатм намуда (1818), дар флоти Балтика хизмат кардааст. Солҳои 1822—25 бо фрегати «Крейсер» ба гирди ҷаҳон саёҳат кард. Соли 1827 дар муҳорибаи Наваринск фармондеҳи батареяи киштии линкори «Азов» буд. Нахимов соли 1834 дар баҳри сиёҳ командири линкори «Силистрия», сипас (1845) командири бригадаи киштиҳо ва 1852 сардори дивизиаи флот таъин шуд. Дар аввалҳои ҷанги Крим (1853—56) ба эскадриляи русҳо роҳбарӣ намуда, соли 1853 дар ҷанги Синоп эскадриляи туркҳоро торумор кард. Аз 5 октябри 1854 Нахимов роҳбари мудофиаи Севастопол. Феврали 1855 командири бандар ва губернатори ҳарбии Севастопол таъир гардид. 10 июли 1855 ҳангоми азназар- гузаронии мавқеъҳо сахт маҷрӯҳ гардида ҳалок шуд. Нахимов арбоби барҷастаи ҳарбӣ буда, дар инкишофи санъати ҳарбии баҳрии рус саҳми бузург гузоштааст. Президиуми Совети Олии СССР бо укази худ аз 3 марти 1944 ба шарафи Нахимов ордени Нахимов (дараҷаҳои 1 ва 2) ва медали Нахимов таъсис кардааст.