СИНЕКЛИЗА

СИНЕКЛИЗА (аз юнонӣ syn— якҷоя ва еnklesis нишеб шудан), фурӯхамидаи доирашакл ва фарохи қишри Замин дар ҳудуди платформа (масалан, Синеклизаи Москва дар платформаи Европаи Шарқӣ, Синеклизаҳои Тунгус ва Вилюй дар платформаи Сибир). Бараш садҳо км; масоҳаташ беш аз 60—100 ҳазор км². Дар Синеклизаҳо одатан ҷинсҳои таҳшинӣ ва таҳшинию вулқоногенӣ қабат-қабат хобидаанд, ки ғафсии умумии онҳо то ба 3—5 км, баъзан то ба 8— 10 км мерасад. Аксари Синеклизаҳо захираи калони ангишт, нефт, газ, намак доранд.