ПРОСЕССИ АДИАБАТӢ

ПРОСЕССИ АДИАБАТӢ, просессе, ки дар системаи физикӣ бидуни мубодилаи гармӣ бо муҳит воқеъ мешавад. Просесси адиабетиро метавон дар сис­темаи аз гармӣ изолятсияшуда ба амал овард. Мисоли ин такти кории мошини ҳароратӣ мебошад, ки дар вақти он дар силиндри гарминогузарони поршендор ҳангоми набудани табдилоти кори соиш ба гармӣ, газ (бур) васеъ мешавад. Просесси адиабетиро ҳангоми набудани пардаи адиабатӣ низ ба амал овардан мумкин аст; барои ин просесс бояд чунон тез сурат гирад, ки барои байни система ва муҳити атроф ба вуҷуд омадани мубодилаи гармӣ фурсат нарасад (масалан, ҳангоми аз мавҷи зарбатӣ фишурда шудани газ гармин ҳосилшуда барои берун рафтан фур­сат наёфта, пурра барои тафсондани худи он сарф мешавад). Просесси адиабетӣ баргарданда (ниг. Просессҳои баргарданда) ва барнагарданда меша­вад. Дар Просесси адиабетии баргарданда энтропияи система доимӣ мемонад. Бинобар он Просесси адиабетии баргардандаро просесси изоэнтропӣ низ меноманд. Дар Просесси адиабетии барнагардан­да энтропияи система меафзояд.