Новожилов Валентин Валентинович (таваллудаш 18.05.1910, Люблин, ҳоло дар Полша), олими советӣ дар соҳаи механика, акад. АФ СССР (1966; аъзо-корр. 1958), Қаҳрамони Меҳнати Сотсиалистӣ (1969). Баъди хатми Институти физика ва механикаи Ленинград (1931) ходими илмии як қатор институтҳои тадқиқоти илмӣ буд; аз соли 1945 профессори кафедраи назарияи чандирии факултети математика ва механикаи Университети Ленинград. Асарҳои Новожилов асосан ба назарияи чандирӣ ва пластикӣ, ҳисобу китоби рӯкаши киштиҳо ва мустаҳкамии конструксияҳои онҳо оиданд.
Новожилов назарияи деформатсияҳои чандирии ҳудудӣ ва назарияи пластикиро, ки дар онҳо микрошиддатҳо ба назар гирифта шудаанд, баён намуд, эффекти Сен-Венанро дар динамикаи милаҳо тадқиқ ва дараҷоти дақиқии ташаккули муодилаҳои асосии назарияи рӯкашҳои чандир ва ба намуди комплексӣ табдил додани онҳоро муқаррар кард. Дар асоси тадқиқотҳои Новожилов ва таҳти роҳбарии ӯ усулҳои амалан ҳисоб кардани статика ва динамикаи киштиҳо бунёд карда шудаанд ва меъёри мустаҳкамии онҳо муайян гардиданд. Бо 2 ордени Ленин ва дигар ордену медалҳо мукофотонида шудааст.