Навидии Куланг

Навидии Куланг (соли таваллудаш номаълум — вафоташ 1460), шоири форс-тоҷик. Дар Балх таваллуд ёфта, пас аз ба камол расидан қисмати зиёди умрашро дар Бухорову Са­марқанд гузаронидааст. Навидии Куланг шахси донишманд, табъаш хеле баланд будааст. Дар сӯҳбатороӣ, ҳозираҷавобӣ машҳур буд. Чанде ба яке аз шайхони тариқати суфия — Мавлоно Муҳаммадамини Зоҳир мурид шуд, ва­ле баъдтар аз ин кор даст кашид. Мувофиқи маълумоти манбаъҳои адабӣ пас аз марги Навидии Куланг шахсе ба номи Назрӣ, аз доираи ҳунармандон, ки ба ӯ мӯътакид буд, ашъорашро ҷамъоварӣ намуд, вале онҳоро ҷилд накард ва он варақҳои пароканда аз байн рафтаанд; андаке аз ғазалиёти шоир тавассути тазкираву маъхазҳои адабӣ то замони мо боқӣ мондааст.