Палладий (лотинӣ Palladium— ба шарафи кашфи саиёраи хурди Паллада чунин номида шудааст), Рd, элементи химиявии гурӯҳи VIII системаи даврии Менделеев, рақами атамиаш 46, массаи атомиаш 106,4; рангаш нуқратоб, зичиаш 12020 кг/м3, 1 гуд. 1552° С, t ҷӯш. 3980° С аст. Палладии табиӣ аз 6 изотопи собит (102Рd, 104Рd, 106 Рd, 106 Рd, 108Рd, 110Рd) иборат аст. Палладийро соли 1803 олими англис У. Волластон кашф кардааст. Палладии металли аз ҳама сабук ва нарми гурӯҳчаи металлҳои платинӣ буда 10-6% массаи қишри заминро ташкил мекунад. Дар табиат дар ҳолати худрӯй ё хула (бо металлҳои нодир ва пайвастҳои химиявӣ) дучор мешавад.
Пайвастҳояш одатан 2 ва 4, баъзан 3-валента буда, пайвастҳои 2-валентааш бештар устуворанд. Аз ҷиҳати химиявӣ дар байни металлҳои гурӯҳчаи платинӣ аз ҳама фаъолтар аст. Дар шаҳшароб, кислотаҳои нитрат ва сулфати ҷӯшон ба осонӣ ҳал мешавад. Ҳангоми то 700° С тафсонидан бо қабати оксид пӯшида мешавад. Дар ҳарорати мӯътадил бо хлор ва бром, дар вақти то сурх шудан тафсонидан бо фтори хушк ва сулфур ба реаксия дохил мешавад.
Бо оксиген РdO, РdO2 бо галогендҳо РdF2, РdF3, РdCL2, РdJ2 ва бо сулфур РdS ва РdS2 ҳосил мекунад. Палладий хосияти хуби гидрргенфурубарӣ дорад (1 ҳаҷм Палладий тахминан 900 ҳаҷм гидрогенро фурӯ мебарад). Аксар намакҳои Палладий дар об нағз ҳал мешаванд. Палладийро дар саноат аз маъданҳои сулфидии мису никел якҷоя бо платина ва маъданҳои тилло ҳосил мекунанд. Палладий ва хулаҳои онро дар электротехника, саноати химия, ҷаводирот, стоматология ва ғайра истифода мебаранд.