РАДЛОВ (Radloff) Василий Василевич (Фридрих Вилҳелм; 5. 1. 1837, Берлин —12. 5. 1918, Петроград), шарқшинос, этнограф ва археологи рус; акад. АФ Петербург (1884). Университети Берлинро хатм кардааст (1858). Директори Музеи Осиёи АФ (1885—1890), Музейи антропология ва этнографияи АФ (1894—1918), яке аз ташаббускорон ва раиси Комитети русии омӯзиши Осиёи Шарқӣ ва Миёна (1903—1918) буд. Солҳои 1860—1870 ба Олтой, Сибир, Қазоқистон в а Осиёи Миёна экспедитсияҳо ташкил карда, доир ба забон, фолклор, этнография ва археологияи халқҳои турк материал ҷамъ овард. Соли 1891 роҳбари экспедитсияи АФ дар Урхон (Муғулистон) буд. Соли 1898 бо роҳбарии Д. А. Клементс ба Турфон (Осиёи Марказӣ) экспедитсия ташкил намуд. Аввалин шуда катибаҳои қадимии туркиро хонда, ба омӯзиш ва нашри осори қадимии уйгурӣ, ки Д. А. Клементс ёфта буд, cap кард.
Радлов яке аз асосгузорони омӯзиши муқоисавӣ-таърихии забонҳои туркист («Грамматикаи муқоисавии забонҳои шимолии туркӣ», ҷилди 1, 1882; «Катибаҳои туркии қадимии Муғулистон», 1894—1895; «Мадхали тавсифи морфологияи забонҳои туркӣ», 1911). Матнҳои зиёди забонҳои туркиро ба табъ расонидааст («Намунаҳои адабиёти халқии қавмҳои турк», ҷилдҳои 1—10, I860—1907; «Луғати лаҳҷаҳои туркӣ», ҷилдҳои 1—4, 1882—1909). Чанде аз асарҳои Радлов ба таснифот, шевашиносии таърихии забонҳои туркӣ ва ғайра бахшида шудаанд.