Охлопков Николай Павлович (15. 5. 1900, Иркутск — 8. 1. 1967, Москва), режиссёри советӣ, Артисти Халқии СССР (1948). Аъзои КПСС аз соли 1952. Фаъолияти актёриаш аз соли 1918 оғоз ёфтааст. Соли 1922 дар Театри Иркутск «Мистерия — Буфф»-и Владимир Маяковскийро ба саҳна гузошт. Аз соли 1923 актёри Театри ба номи Мейерхолд. Солҳои 1930—37 роҳбари Театри реалистӣ, 1938—43 режиссёр ва актёри Театри ба номи Вахтангов, 1943—66 саррежиссёри Театри драмаи Москва (аз 1954 Театри ба номи Маяковский). Бештар спектаклҳои қаҳрамонию фоҷиавиро ба саҳна мегузошт.
Корҳои намоёни режиссёриаш: «Модар»— аз рӯи романи Максим Горкий, «Сели оҳанин» — аз рӯи асари Серафимович (ҳарду 1933), «Ашрофон»-и Н. Погодин (1935) — дар Театри реалистӣ; “Фулӣдмаршал Кутузов”-и В.А. Соловёв (1940), “ Сирано деБержерак»-и Э. Ростан (1942) — дар Театри ба номи Вахтангов; «Гвардияи ҷавон» (аз рӯи асари А. Фадеев, 1947), «Гамлет»-и У. Шекспир (1954), «Таърихи Иркутск»-!и А. Н. Арбузов (1960), «Медея»-и Еврипид (1961)— дар Театри ба номи Владимир Маяковский. Дар Театри калон операҳои «Модар»-и Т. Н. Хренников ва «Декабристон»-и Ю. А. Шапоринро ба саҳна гузоштааст.
Аз солҳои 20 ҳамчун актёр ва режиссёри кино баромад кардааст. Ролҳои намоёнаш: Василий Буслаев («Александр Невский»), Василий («Ленин дар Октябр»), комиссар Воробёв («Достони марди ҳақиқӣ»), Батманов («Дур аз Москва»). Омӯзгори ГИТИС (профессор). Лауреата Мукофотҳои давлатии СССР (1941, 1947, 1949 — ду карат, 1951 — ду карат). Бо ордени Ленин, 3 ордени дигар ва медалҳо мукофотонида шудааст.