АБРБАНДӢ , санъати гулпартоӣ бо танидани абрешим ва ресмоне, ки дар натиҷаи ҳамкории устохон нусхапарто, абрбанд, рангуборчӣ, кабудгар, қаткушо сурат мегирад. Дар Абрбандӣ нусхапарто тарҳи гули матоъро кашида, абрбанд, рангуборчӣ, кабудгар, каткушо эҷоди ӯро амалӣ мекунанд. Нусхапартоӣ, абрбандӣ ва қаткушоӣ дар абрбандхона, рангдиҳӣ дар устохонаҳои рангубор ва кабудгарӣ сурат мегирад.
Дастгоҳи Абрбандӣ аз ду чӯбчаи дарозиаш 1-метрӣ ва ду ҷуфт мехи чӯбини дарозиаш 1 -1,2 метр, ки дар фосилаи 3 – 3,5 метр аз ҳам ба фарш кӯфта шудаанд, иборат мебошад. Абрбанд ҷойи ранги аввали танидаро кушод гузошта, ҷойҳои дигар рангҳоро тавассути ресмони ғафси обногузар ме- бандад. Баъда ҳар як рангубор абрбанд ҷойи навбатии рангдиҳиро кушода, ҷойҳои рангдодаро мебандад. Зимни ҳар як рангмолӣ абрбанд ин амалро такрор менамояд.
Гулҳои нақш табишҳои гуногун: сурх, сабз, зард, кабуд, сиёҳ ва ғайра дошта, ҳар яки он дар натиҷаи рангдиҳии навбатӣ ҳосил мегардад. Баъди Абрбандӣ ва рангдиҳӣ танидаро дар байни мехҳои чубин таранг мекашанд. Танидаи нақшини чилашуда баъди теғкашӣ, гулбардорӣ, оҳардиҳӣ ва ғайра ба бофтан омода мешавад.