МУРОФИАИ НЮРНБЕРГ, мурофиаи судии як гурӯҳ ҷинояткорони асосии ҳарбии фашистӣ. Аз 20 ноябри 1945 то 1 октябри 1946 дар Нюрнберг (Германия) дар Трибунали ҳарбии байналхалқӣ барпо гардид. Ходимони олирутбаи давлатию ҳарбии Германияи фашистӣ, ки зидди сулҳу инсоният сӯиқасд ташкил карда буданд, ба суд дода шуданд: Г. Геринг, Р. Гесс, И. фон Риббентроп, В. Кейтель, Э. Кальтенбруннер, А. Розенберг, Г. Франк, В. Фрик, Ю. Штрейхер, В. Функ, К. Дёниц, Э. Редер, Б< фон Ширах, Ф. Заукель, А. Йодль, А. Зейс-Ипкварт, А. Шпеер, К. фон Нейрат, Г. Фриче, Г. Шахт, Р. Лей (то саршавии мурофиа худашро овехт), Г. Крупп (бемори табобатнашаванда дониста шуда, кори ҷиноятиаш нигоҳ дошта шуд), М. Борман (аз сабаби ғайб зада, дастгир нашуданаш ғоибона суд карда шуд), Ф. фон Папел. Дар ҳамин суд масъалаи ҷинояткор шумурдани ташкилотҳои фашистии Германия: ҳайати роҳбарикунандаи партияи насионал-сотсиалистӣ, отрядҳои штурм (СА) ва муҳофизаткунандаи партияи натсионал-сотсиалистӣ (СС), хизмати бехатарӣ (СД), полисиям махфии давлатӣ (гестапо), кабинети давлатӣ ва штаби генералӣ низ муҳокима шуд. Дар давраи мурофиа 403 маҷлиси кушоди судӣ барпо гардид, ки дар онҳо 116 шоҳид пурсида, баёноти бешумори хаттӣ ва ҳуҷҷатҳои далелнок муҳокима шуданд.
Барои координасияи фаъолияти тафтишотӣ ва айбдоркуниро дастгирӣ кардан аз айбдоркунандагони асосӣ комитет ташкил карда шуд: аз Иттифоқи Республикаҳои Советии Сотсиалистӣ СССР (Р. А. Руденко), Штатҳои Муттаҳидаи Америка (Роберт X. Ҷэксон), аз Британияи Кабир (X. Шоукросс) ва аз Франсия (Ф. де Ментон,, баъд Ш. де Риб).
30 сентябри— 1 октябри 1946 ҳукмнома эълон шуд. Ҳамаи айбдоршудагон (ғайр аз Шахт, Фриче ва Ф. фон Папен) гунаҳгор ҳисоб шуданд. Г. Геринг, И. фон Риббентроп, В. Кейтель, Э. Кальтенбруннер, А. Розенберг, Г. Франк, В. Фрик, Ю. Штрейхер, Ф. Заукель, А. Йодль, А. Зейс- Инкварт ва М. Борман (гоибона) ба қатл, Р. Гесс, В. Функ ва Э. Редер ба ҳабси якумра, Б. Дон Ширах ва А. Шпеер 20 сол, К. фон Нейрат — 15 сол, К. Дёниц 10-сол ба ҳабс маҳкум шуданд. Трибунал СС, гестапо, СД ва ҳайати роҳбарикунандаи партияи насистиро ташкилотҳои ҷиноятӣ эътироф кард. Аъзои Трибунал аз Иттифоқи Ркспубликаҳои Советии Сотсиалистӣ СССР доир ба сафед кардани Шахт, Фриче, Папен ва ташкилоти ҷиноятӣ эътироф нашудани штаби генералию кабинети вазирон норозигии махсус изҳор кард. Дархости маҳкумшудагон оид ба афвкунӣ аз тарафи Советӣ назорат рад шуда, шаби 16 октябри 1946 ҳукмномаи қатл иҷро шуд (Г. Геринг то вақти иҷрои ҳукмнома худро кушт).
Мурофиаи Нюрнберг дар таърих аввалин суди байналхалқиест, ки таҷовузро ҷинояти вазнинтарин шуморида, ходимони давлатиро дар тайёр, cap кардан ва бурдани ҷангҳои таҷовузкорона чун ҷинояткорон ҷазо додааст.
Принсипҳои дар Устави трибунал қайдшудаи ҳуқуқи байналхалқиро Ассамблеяи Генералии Ташкилоти Давдатҳои Муттаҳида 11 декабри 1946 тасдиқ кард.