ЧОРХИШТ

ЧОРХИШТ, чархушт, охури махсуси хиштиро гӯянд, ки андаруни вай ангурро пахш карда шарбаташро мегиранд. Чорхиштро аз рӯи замин дар баландии тақр. 0,5 м месозанд. Деворҳои Чорхиштро аввал бо коҳгил баъд бо гаҷ мелованд. Фарши Чорхиштро ба тарафи сӯрохӣ моил месозанд ки он дар яке аз кунҷҳои Чорхишт мебошад. Дар дохили Чорхишт ду чӯб ё тахтаи андозааш ба он мувофиқро (ғафсиаш 10—12 см) ва ба рӯяш чӯби дарахти биҳиро кӯндаланг мегузоранд. Бар болои он чорчуба қабати ғафси хори явтоқ (уштухор)-ро мехобонанд. Сипас, ангурро ба рӯи хорҳо мерезанд (хорҳо вазифаи софкунакро адо мекунанд). Сӯрохии Чорхишт тарновча дорад, ки бо он шарбати ангур ба хумҳои калон мерезад. Сипас аз шарбати гирифташуда ширинӣ мепазанд. Ҳоло ҳам дар баъзе ноҳияҳои Тоҷикистон вуҷуд дорад.