АБУНАСРИ МАНСУР

АБУНАСРИ МАНСУР ибни Алӣ (соли таввллуд номаълум – вафот тақрибан 1036), мунаҷҷим ва риёзидони хоразмӣ. Нахустин устоди Абурайҳони Берунӣ. Бахшида ба шогирдаш дар боби нуҷуму риёзиёт 12 рисола таълиф намуда­аст. Ба қавли Умари Хайём «риёзидо­ни бузурги даврон» буд.

Дар Хоразм бо Ибни Сино, Абусаҳди Масеҳӣ, Абулхайри Хаммор ва Абурайҳони Берунӣ ҳамкории илмӣ дошт. Доир ба тригонометрия ва астрономия чанд асар менависад, ки «Ал-Маҷастӣ аш- шоҳӣ» («Ал-Маҷастии шоҳӣ»), «Ри­сола фӣ-л-устурлоб» («Рисола доир ба устурлоб») аз қабили онҳост. Ба асарҳои олимони Юнони Қадим Менелай ва Евклид (Уклидус) шарҳ навиштааст.