БОҚИЕВ Худойназар Ғоибович (8.3.1951, деҳаи Хонақоҳи Кӯҳии ноҳияи Ҳисор-29.5.2012, ноҳияи Рӯдакӣ), варзишгари тоҷик, гӯштингир, Устоди варзиши Тоҷикистон (1975), Устоди варзиши ИҶШС (1976), Мураббии хидматнишондодаи варзиши Ҷумҳурии Шӯравии Сотсиалистии Тоҷикистон (1988), Аълочии маорифи Тоҷикистон (1999), Корманди шоистаи варзиши Тоҷикистон (2002). Хатмкардаи Техникуми тарбияи ҷисмонии шаҳри Душанбе (1970). Солҳои 1970-75 муаллими тарбияи ҷисмонии Омӯзишгоҳи касбҳои техникии № 49-и ноҳияи Ленин (ҳозира Рӯдакӣ), 1975-80 мураббии Ҷамъияти ихтиёрии варзишии «Ҳосилот», 1980-85 сармураббии Мактаби варзишии кӯдакону наврасони № 1 (ҳозира Мактаби махсуси варзишӣ оид ба дзюдо)-и ноҳияи Рӯдакӣ буд. Аз соли 2010 директори ҳамин мактаб. Боқиев дар мусобиқаҳои варзишии сершумори Тоҷикистон ва ИҶШС иштирок намуда, борҳо ғолиб ва сазовори медалу ҷоизаҳо гаштааст. Чемпиони 49-каратаи Тоҷикистон оид ба гӯштини дзюдо ва самбо. Боқиев дар тарбияи гӯштингирони ҷавони тоҷик саҳми калон дорад. Гӯштингирони номии ҷумҳурӣ Расул, Рустам ва Алишер Боқиев шогирдон ва фарзандони ӯянд. Бо Грамотаи Фахрии Президиуми Шӯрои Олии Ҷумҳурии Шӯравии Сотсиалистии Тоҷикистон (1979), Ифтахорномаи Президенти Ҷумҳурии Тоҷикистон (1996), медали «Хидмати шоиста» сарфароз гардидааст.
Н. Шарипов.