ФАРҒОНА, вилоятест дар ҳайати РСС Узбакистон 15 январи 1938 ташкил шудааст. Масоҳати 7,1 ҳазор км2. Аҳолиаш 1900 ҳазор нафар (1984), аҳолии шаҳрӣ 34%. 13 райони маъмурӣ, 8 шаҳр ва 10 птш дорад. Марказаш шаҳри Фарғона. Сатҳи вилоят асосан ҳамвор аст (дашти Қароқалпоқ); набототаш биёбонист.
Ҳарорати миёнаи январ —3°С, июл 28°С. Боришоти солона 170—350 мм. Дарёи асосиаш Сир. Заминҳо аз Канали Ҷануби Фарғона, Канали Калони Фарғона, Канали Калони Андиҷон ва обанбори Фарғона обёрӣ мешаванд. ГРЭС-и Қувасой сохта шудааст. Нефт ва газ истихроҷ мекунанд. Соҳаҳои асосии саноат: заводҳои пахта, бофандагӣ, химия, коркарди нефт, масолоҳи бинокорӣ, хӯрокворӣ. Фарғона ноҳияи муҳимми пахтакории Узбакистон аст. Боғу токдорӣ, сабзавоткорӣ, чорводорӣ низ ривоҷ ёфтааст.