ТАККА

ТАККА, така, нарбузи наслафзоеро гӯянд, ки аз бузғолаи бузҳои хушзот интихоб мешавад. Таккаро аз 18 моҳагӣ (то 7—8 сол) барои ҷуфтӣ кардан истифода мебаранд. Така бояд хушзот, ҷисман пурқувват, солим, сохти баданаш беҷирм бошад. Бузғолаи нари хушзотро аз 15—20-рӯзагӣ, 4,5—5, 12 ва 18-моҳагӣ интихоб мекунанд.

Такаи зоти бузҳои маҳаллӣ дар 15—20-рӯзагӣ 5—7 кг, 4,5—5-моҳагӣ то 22—25 кг, 12-моҳагӣ то 30— 35 кг; 15-моҳагӣ то 50 кг ва 4,5—5-солагӣ то 90—100 кг мешавад. Вазни такаи зоти буҳои серпашми советӣ, ки дар республика мавқеи асосӣ дорад, мувофиқан 4—6 кг, 18— 20 кг, 25—30 кг, 35—40 кг ва то 66— 70 кг аст. Дар мавсими ҷуфтӣ бо нутфаи як така то 500 (сунъӣ) ва 50— 60 (табиӣ) буз бордор мегардад. Такаҳоро баъди ба охир расидани давраи ҷуфтӣ (ноябр—декабр) ба рамаҳои алоҳида (дар ҳар рама 90—100 сар) ҷудо мекунанд. Д. Эргашев.