Новомосковск (то соли 1934-Б о б р и к и, аз соли 1934 то 1961 — Сталиногорск), шаҳрест дар вилояти Тулаи РСФСР. Дар территорияи ҳавзаи ангишти назди Москва воқеъ гаштааст. Стансияи роҳи оҳан. Аҳолиаш 147 ҳазор нафар (1979). Новомосковск маркази калони саноати химияи СССР мебошад. Иттиҳодияи истеҳсолии «Азот», комбинати молҳои химиявӣ, заводҳои синтези органикӣ ва «Полимерконтейнер», корхонаҳои саноати ангишт, хӯрокворӣ ва сабук, ГРЭС дорад.
Дар асоси ашёи хоми маҳаллӣ комбинати гач, заводи шамот ва дигар заводҳо кор мекунанд. Институтҳои тадқиқоти илмӣ ва лоиҳакашии саноати ангишт ва мошинҳои кон ва ғайра, филиалҳои Институти давлатии саноати нитроген ва Институти химияю технологии Москва, 3 техникум, омӯзишгоҳҳои тиббӣ ва мусиқи, театри драма ва музеи таърихи шаҳр мавҷуданд. Новомосковск соли 1929 ба муносибати cap шудани сохтмони комбинати химиявӣ ва ГРЭС бунёд ёфта, аз соли 1930 — шаҳр. Новомосковск бо ордени Байрақи Сурхи Меҳнат мукофотонида шудааст (14 январ 1971).