САЪДИ БУХОРОӢ- Саъдуддии Асад ибни Шиҳоб (соли таваллуд ва вафот номаълум), шоири форс-тоҷик (асри 12). Муҳаммади Авфӣ дар «Лубоб-ул-албоб» Саъдии Бухороиро яке аз шахсиятҳои маъруфи Бухоро номидааст. Дар овони пирӣ ӯ гӯшанишинӣ ихтиёр карда, дар маҳаллаи Ҳавзи Имомон иқомат дошт. Аз осори ӯ қасидаҳою ғазалҳо ва абёти пароканда ба воситаи тазкираҳо боқӣ мондааст, ки аксар ба мавзӯъҳои динии тасаввуфӣ оиданд. Дар сурудаҳои ӯ ақоиди панду ахлоқи аз қабили мазаммати ҳирсу тамаъ, дур будан аз зулм, сар кашидан аз сӯҳбати сифлагон ва ғайра баён гардидаанд. М. Диловаров.