ПРИНСИПИ Д’АЛАМБЕР-ЛАГРАНЖ

ПРИНСИПИ Д’АЛАМБЕР-ЛАГРАНЖ, яке аз принсипҳои асосии механика аст. Таърифаш: агар ба қувваҳои фаъоле, ки ба нуқтаҳои системаи механикии алоқаи механикиашон идеалӣ таъсир мекунанд, қувваҳои инерсияро зам кунем, он гоҳ дар ҳар лаҳзаи вақт ҳосили ҷамъи корҳои элементарии қувваҳои фаъол ва қувваҳои инерсия ба­рои ҷойивазкунии дилхоҳи система ба сифр баробар хоҳад шуд. Принсипи Д’Аламбер- Лагранж усули умумии ҳалли масъалаҳои динамика ва статикаро ифода намуда, ҳаракати системаи механикиро бидуни реаксияҳои алоқаи номаълум тадқиқ менамояд. Мавсум ба олимони франсавӣ Ж. Д’Аламбер ва Ж. Лагранж.