Озах, нумӯи ғайриилтиҳобӣ ва бехавфи қабатҳои болоии пӯст, ки зоҳиран ба гиреҳча ё пистонак монанд аст. Озах оддӣ, мусаттаҳ, нӯгтез ва пирӣ мешавад. Озахи о д д ӣ дар пушти даст ё панҷаҳо пайдо мешавад. Вай дард намекунад, пӯсташ сахту ғафс буда, бо пӯсти муқаррарӣ ҳамранг аст.
Озахи пой, ки аз фишори пойафзоли танг пайдо мешавад, низ яке аз намудҳои Озаҳи оддӣ мебошад. Чунин Озах одатан хеле сахту дарднок буда, баъзан барои муваққатан аз кор мондани кас сабаб мешавад. Озахи мусаттаҳ одатан дар пушти даст ва пӯсти рӯи бачагон ва наврасон мебарояд. Шакли он лӯнда ё ба гиреҳчаҳои мусаттаҳ монанд аст.
Озахи нӯгтез гиреҳчаҳои гулобранги майдаест, ки барҷастагии пистонакшакли поячадор ҳосил мекунад. Вай аксар вақт дар узвҳои ҷинсӣ, сурин ва ғайра ҳангоми ифлос будани тан инкишоф меёбад. Озахи п и р ӣ дар рӯй, гардан ва шиками одамони калонсол чун аломатчаҳои хокистарранг, ҷигарӣ ё сиёҳтоб, ки бо моддаи нарми шахшул пӯшида шудааст, пайдо мешавад.
Муолиҷа: Озахҳои оддӣ, пирӣ ва мусаттаҳро дар натиҷаи ба нитрогени моеъ, хлор этил ях кунонидан, электрокаогулясия, ҷараёни галвами ва усулҳои дигар, инчунин доруҳо нест мекунанд; Озахҳои оддӣ ва мусаттаҳро бо гипноз низ нест кардан мумкин аст. Озахҳои пойро бо маҳлули новокаин ва Озахҳои нӯгтезро бо роҳи ҷарроҳӣ табобат мекунанд.