Оссиллятор (аз лотинӣ oscillo — мелаппам), системаи физикаи лаппандаро гӯянд. Системам механикие, ки дар наздикии нуқтаи мувозинат мелаппад, Оссиллятори классикӣ ном гирифтааст. Агар энергияи потенсиалии Оссиллятор ба квадрати тамоил аз вазъияти мувозинат (ин ҳолат дар мавридҳои лаппишҳои хурд ҷой дорад) мутаносиб бошад, онро Оссиллятори мавзунӣ (гармоникӣ) меноманд.
Мафҳуми Оссилляторро дар системаҳои ғайримеханикии лаппандае, ки дар электромагнетизм, акустика, назарияи ҷозиба ва ғайра ба амал меоянд, низ истифода мебаранд. Яке аз намудҳои бештар маъмули Оссиллятори электрӣ контури лаппандаест, ки дорои индуктивият ва ғунҷоиш мебошад. Оссиллятор дар назарияи ҷисми сахт, назарияи афканишоти электромагнитӣ, назарияи лаппиши спектри молекулаҳо роли муҳим мебозад.