Олстер (Ulster), 1) вилояти таърихӣ дар қисми шимоли ҷазираи Ирландия. Аз нимаи дуюми асри 12 тобеи Англия. Асрҳои 16—18 маркази шӯришҳои зиддимустамликадорӣ гардид. Баробари тараққиёти капитализм дар Ирландия саноати Олстер низ зуд ривоҷ ёфт. Консерваторҳои англис аз низоъҳои миллӣ ва динӣ (байни католикҳою протестантҳо) истифода бурда, солҳои Ҷанги якуми ҷаҳонӣ (1914—18) Олстерро ба майдони муборизаи зидди автономияи Ирландия ва ба такягоҳи ҳаракати сепаратии юнониҳо (тарафдороии ягонагии Англияю Ирландия) табдил доданд.
Мувофиқи созишномаи Англияю Ирландия (1921) қисми зиёди Олстер (6 графӣ: Антрим, Арма, Даун, Лондондерри, Тирон ва Фермана) мутеи Британияи Кабир гардид (нигаред Ирландияи Шимолӣ); графиҳои Донегол, Монахан ва Каван ба хайати музофоти Олстери давлати мустақили Ирландия (аз 1949 Республикаи Ирландия) дохил шуданд. 2) Дар матбуот баъзан он қисми Ирландия (6 графи)-ро, ки ба ҳайати Британияи Кабир ва Ирландияи Шимолӣ дохил мешавад, Олстер меноманд.
Охири солҳои 60 ва аввали 70-уми асри 20 ба фишори полисия ва террори унсурҳои рости экстремистӣ нигоҳ накарда дар ин графиҳо барои ҳимояи ҳуқуқи католикҳои ақаллият ҳаракатҳои демократӣ ҳарҷониба авҷ гирифтанд. Соли 1969 ҳукумати Англия бо баҳонаи ҷорӣ кардани тартибот ба ин ҷо қӯшун фиристод. Аз соли 1972 ин ҷониб Ирландияи Шимолӣ бевосита аз Лондон идора карда мешавад; ҳукумат ва парламенти Ирландияи Шимолӣ бошад, пароканда карда шуд.