Олег (вафот 912), князи Руси Қадим. Бино ба маълумоти солномаҳо, хеши Рюрики нимафсонавӣ буда, баъди вафоти ӯ князи Новгород шудааст. Олег соли 882 ба замини кривичҳо юриш карда, шаҳри марказии онҳо — Смоленскро забт намуд. Олег шаҳри Любич, баъд Киевро ишғол карда, ба пойтахти давлати худ табдил дод.
Солҳои 883—885 заминҳои древлянҳо, северянҳо, радимичҳо ва то аввали 907 вилоятҳои вятичҳо, хорватҳо, дулебҳо ва тивериҳоро забт намуд. Олег аз қабилаҳои тобеъ андоз мегирифт, онҳоро ӯҳдадор карда буд, ки ҷанговар диҳанд.
Бо хазарҳо бомуваффақият меҷангид. Соли 907 пойтахти Византия Қусталтанияро муҳосира намуда, ба гардани империя товони ҷангро бор кард. Соли 911 бо Византия шартномаи тиҷоратии фоиданок баст. Мувофиқи ривоятҳо Олег аз газидани мор мурдааст ва ин ҳодиса асоси бисёр суруд, афсона ва ривоятҳо гардидааст.