Нуриҳои фосфордор, моддаҳои минералиеро гӯянд, ки чун манбаи ғизои растани истифода мешаванд. Нуриҳои фосфордорро асосан дар саноат аз апатит ва фосфоритҳо истеҳсол мекунанд. Моддаҳои органикӣ (орди устухон, пору, фосфатдажғол ва ғайра)- ро низ чун Нуриҳои фосфордор истифода мебаранд. Нуриҳои фосфордор яке аз аввалин нуриҳои минералӣ, ки дар саноат ҳосил кардаанд.
Нуриҳои фосфордор аз ҷиҳати ҳалшавӣ 3 навъанд: дар об ҳалшаванда (суперфосфат, суперфосфата дучанда, суперфосфати аммонийдор), дар ситрат (маҳлули ишқордори ситрати аммоний — реактиви Петерман) ва ҷавҳари лиму ҳалшаванда (пресипитат, фосфатдажгол, фосфати бефтор, фосфата гудохтаи магний).
Нуриҳои фосфордор ҳосилро зиёд, сифати онро беҳтар ва растаниҳоро ба хушкӣ тобовар мегардонанд. Истифодаи Нуриҳои фосфордор (60 килограмм /гектар Рг05; нурии асосӣ) ҳосили ҳар га гандуми тирамоииро 2—5 сентнер ва гандуми баҳориро 1,5—2,5 сентнер (60—80 килограмм/гектар Р2О5) зиёд мекунад. Дар СССР ҳамчун нурии асосӣ (ҳангоми шудгор ё култивасия) ба ҳар гектар 60—120 килограмм ва дар вақти кишт 10— 40 килограмм Р2О5 меандозанд. Дар заминҳои обии республикаҳои Осиёи Миёна 100—120 килограмм/гектар Р2О5 ҳосили ҳар гектар пахтаро 3—5 сентнер зиёд мекунад.