Наср Ибни Аҳмад ибни Исмоил (Насри II, соли таваллуд тахминан 906 — вафот 943), ҳокими давлати Сомониён. Азбаски Наср ибни Аҳмад ҳанӯз ноболиғ буд, давлатро аз номи ӯ аввал вазир Абӯабдуллоҳи Ҷайҳонӣ, сони вазир Абулфазли Балъамӣ идора мекарданд. Дар ин давра барои тахту тоҷ дар байни аъзоёни сулолаи Сомониён задухӯрдҳои тезу тунд ба вуқӯъ омаданд, вале зуд бартараф карда шуданд. Дар замони Наср ибнм Аҳмад дар Хуросон ва Мовароуннаҳр ҳаракати шиаҳо авҷ гирифта нуфузи оиҳо чунон пурзӯр мегардад, ки ҳатто худи Наср ибни Аҳмад мазҳаби шиаро кабул кард. Рӯҳониёни суниии давлати Сомониён аз ин кори Наср ибни Аҳмад норозӣ шуда, бар зидди ӯ сӯиқасд карданд, аммо Наср ибни Аҳмад онро ошкор сохт. Бо ин ҳама, соли 943 Наср ибни Аҳмад аз тахту тоҷ даст кашид ва онро ба писарашНӯҳ I вогузошт. Дар замони Наср ибни Аҳмад давлати Сомониён аз ҷиҳати иқисодӣ ва маданӣ нашъунамо ёфт. Ӯ қасру биноҳои пуршукӯҳи зиёде буньёд кард.
Ад.: Бартольд В. В., Туркестан в эпоху монгольского нашествия, Сочинение, том 1, Москва, 1963; Негматов Н. Н., Государство Саманидов (Мавераннахр и Хорасан в IX—X вв.), Душанбе, 1977.