МУРОДИИ БУХОРОӢ Абулҳусайн Муҳаммад ибнии Муҳаммад (соли таваллуд ва вафот номаълум), шоири асри 10 форс-тоҷик. Зодгоҳаш Бухоро. Бино ба гуфтаи Саолибӣ («Ятимат-уд-даҳр») Муродии Бухорои дар замони салтанати Сомониён зиставу эҷод карда, шӯҳрати зиёде ёфтааст. Муродии Бухорои яке аз ҳамсӯҳбатони устод Рӯдакӣ буда, пеш аз ӯ вафот кардааст. Рудакӣ дар ин бора бо матлаи зерин марсияе навиштааст:
Мурд Муродӣ, на хамоно, ки мурд,
Марги чунин хоҷа на корест хурд…
Муродии Бухороӣ аз шоирони соҳибдевон буда, ба арабӣ низ шеър месурудааст, вале аз ашъори арабиаш 27 байт ва аз форсӣ тоҷикиаш 2 байт маҳфуз мондааст.
Адабиёт: М и р з о е в А., Абу Абдулло Рӯдакӣ, Сталинобод, 1958; Ашъори хамасрони Рӯдакӣ, Сталинобод, 1958.
Н. Қаҳҳорова.