МУЛЛОБЕҲЗОД

МУЛЛОБЕҲЗОД  (соли таваллуд ва вафот номаълум), мусаввири асри 17 тоҷик, намояндаи мактаби минётури Бухоро. Дар китобхонаҳои Абдулазизхон ва Субҳонқулихон кор кардааст. Аз ҳунари ӯ чор минётур дар «Хамса»-и Низомӣ (солҳои 1668— 71 дар Бухоро китобат шудааст; дар коллексияи Честер Битти, Дублин) боқӣ мондааст. Тахмин меравад, ки Муллобеҳзод дар ороишоти дигар дастнависҳои мӯътабари он давр, ба мисли Достонҳо аз «Шоҳнома”-и Фирдавсӣ (коллексияи О. Омбер) «Шоҳнома» (1966, дар Институти шарқшиносии Академияи Фанҳои Республикаи Советии Сотсиалистии  Ӯзбекистон) ва ғайра иштирок кардааст. Дар бораи Муллобеҳзод дар «Муҳит-ут-таворих» маълумот ҳаст. Дар асарҳои Муллобеҳзод таъсири мактаби минётури ҳинд, ки хоси санъати тасвирии Мовароуннаҳр аст, мушоҳида мешавад.

М. Ашрафӣ.