МОНОЦИТҲО

МОНОЦИТҲО (аз моно… ва юн. kytos — зарф, дар ин ҷо ҳуҷайра), яке аз шаклҳои ҳуҷайраҳои сафеди бедонаи хун — агранулитҳо. Моноцитҳо дар мағзи устухон ба вуҷуд меоянд; одатан ядрои лубиёшакл ва цитоплазмаи сустбазофилӣ доранд. Дар хуни мӯътадили одам 4—8%-и лейкоцитро ташкил медиҳанд. Андозаи Моноцитҳо 12—20 мкм аст. Моноцитҳо қобилияти фагоцитоза доранд ва аз хун ба бофта гузашта ба макрофагҳо табдил меёбанд.