МОДАРШОҲӢ, яке аз шаклҳои сохти ҷамъиятии давраи таназзули ҷамоаи авлодӣ ва гузариш ба ҷамъияти синфӣ. Аломатҳои махсуси Модаршоҳӣ: афзалияти мавқеи зан дар ҷамъият, аз тарафи зан ба хешу табор мерос гузоштани молу мулк ва вазифа, барои иқомат ба манзили зан омадани шавҳар ва ғ. Давраи Модаршоҳиро бори аввал муарриху ҳуқуқшиноси швейцарӣ И. Я. Бахофен (1815—87) дар асоси таҳлили асотири қадимии классикӣ муайян намуд. Модаршоҳӣ дар байни баъзе халқҳои Тибет, Мисри Қадим ва дигар давлатҳои қадим бо шаклҳои гуногун зоҳир гардидааст. Дар байни халқи минангкабау (ҷазираи Суматра) ва баъзе халқҳои Микронезия ва ғ. нишонаҳои Модаршоҳӣ боқӣ мондаанд. Модаршоҳӣ бо мурури замон ба падаршоҳӣ иваз шуд. Ниг. низ Авлод, Ҷамоаи ибтидоӣ.