МИРСАИДАЛӢ (соли таваллуд ва вафот номаълум), мусаввири асри 16. Писари минётуркаш Мир Мусаввир. Давраи аввали эҷодиёташ дар китобхонаи Табрез гузаштааст. Яке аз минётурҳои «Хамса»-и Низомӣ, ки солҳои 1539—43 дар он ҷо китобат шудааст (дар Музеи Британияи Лондон маҳфуз аст), намунаи ҳунари ӯст. Он «Маҷнун дар назди хаймаи Лайлӣ» ном дорад. Соли 1544 Мирсаидалӣ ба Ҳиндустон рафта, дар дарбори Темуриёни Ҳинд ба нигориши минётур пардохт. Ӯ дар ин ҷо сабки хоси мактаби минётури Табрезро идома дода аст.
М. Ашрафӣ