МИНТАҚАИ ГЕОСИНКЛИНАЛИИ БАҲРИ МИЁНАЗАМИН, яке аз калонтарин ноҳияҳои аз ҷиҳати тектоникӣ серҳаракати қишри Заминро гӯянд, ки платформаҳои Европаи Шарқӣ, Сибирь, Хитою Корея ва Хитой Ҷанубиро аз платформаҳои Африкаю Арабистон ва Ҳиндустон ҷудо мекунад. Минтақа дар Ғарб аз гул. Гибралтар ба воситаи материки Евросиё то галаҷазираи Индонезия тӯл кашида, дар Ш. бо минтақаи геосинклиналии уқёнуси Ором пайваст мешавад. Қисми зиёди Европаи Ғарбӣ ва ҷанубӣ, баҳри Миёназамин, Африкаи Шимолӣ (Марокко, Алҷазоир, Тунис), Осиёи Ҷанубӣ Ғарбӣ ва галаҷазираи Индонезияро дар бар мегирад. Ба ин минтақа ноҳияи чиндори герцирнии Европаи Ғарбӣ ва Марказӣ, ноҳияи чиндори алий ва ноҳияи чиндори Индонезия дохил мешавад. Ҷои ҳозираи Минтақаро дар эраҳои палеозой ва мезозой уқёнуси калони Тетис ишғол мекард.