МЕДЕО, яке аз калонтарин иншооти спортии ҷаҳон барои гузарондани мусобиқаҳои спортии зимистона. 12 км дуртар аз ш. Алмаато дар баландии 1691 м аз с. б. сохта шудааст (1972). Стадиони яхпӯш (яхи сунъӣ) асоси комплекси Медео буда, 10,5 ҳазор м2 вусъат дорад. Майдони яхпӯши стадионро 3 пайраҳаи варзиши сабук, ки барашон 5 м мебошад, фаро мегирад; дарозии 2-тои онҳо 400 м буда, барои конькибозон ва пайраҳаи сеюм (дохилӣ) барои маищҳои тайёрии варзишгарон аст. Майдони стадион барои машқу мусобиқаҳои рақси рӯи ях ва яхмолакбозии оммавӣ истифода мешавад. Медео барои 10,5 ҳаз. тамошобин ҷои нишаст дорад. Дар таҳти минбарҳои стадион зиёда аз 200 хона, аз ҷумла поликлиника барои варзишгарон, зали кино, зали спортӣ, ҳуҷраҳои тренерон, кабинаҳои алоқаи телефони байнишаҳрӣ, буфет, хонаҳои либоспӯшии варзишгарон ва ғ. мавҷуданд. Соли 1975 коллективи мутахассисон (лоиҳакашон ва бинокорон) барои сохтмони бинои Медео лауреати Мукофоти давлатии СССР гардид.