«ЧӢ БОЯД КАРД?» Масъалаҳои рӯзмарраи ҳаракати мо», асари В. И. Ленин, ки дар он идеяи ташкил намудани партияи пролетарии нав ҳаматарафа асоснок шудааст. В. И. Ленин дар ин китобаш «иқтисодчигӣ»-ро ҳамчун як навъи оппортуннизми байналхалқӣ— бернштейнчигӣ аз ҷиҳати ғоявӣ тору мор кард. Асар тирамоҳи 1901— февр. 1902 навишта ва марти 1902 дар Штутгарт чоп шудааст.
В. И. Ленин дар боби 1-уми китоб равияи революционӣ — марксистиро дар ҳаракати коргарӣ ҳимоя намуда, нишон дод, ки бернштейпчиён дар зери ниқоби шиори «озодии танқид» нуқтаҳои асосии марксизмро ревизия мекунанд: ғояи революцияи пролетарӣ ва диктатураи пролетариатро рад ва «ҳамкории синфҳо»-ро таргиб менамоянд.
Дар боби 2-юм масъалаи таносуби стихиявӣ ва шуурнокиро дар ҳаракати коргарӣ ҳал кардааст.
Дар боби 3-юм масъалаи таносуби иқтисодиёт ва сиёсат, шаклҳои иқтисодӣ ва сиёсии муборизаи синфии пролетариат равшан карда мешавад.
В. И. Ленин дар бобҳои 4 ва 5-ум плани ташкил намудани партияи марксистиро асоснок кард. У чунин мешумурд, ки барпо намудани партия бояд аз ташкил кардани газетаи сиёсии умумирусӣ cap шавад. Чунин газета «Искра»-и ленинӣ гардид.
В. И. Ленин дар «Хотима»-и асари худ ба саволи «чӣ бояд кард?» чунин ҷавоб дод: харҷу марҷи ташкилӣ ва калавишҳои ғоявӣ дар сафҳои социалдемократияи рус бартараф карда шуда, Ташкилоти ҷанговари революционерон барпо карда шавад. Идеяҳои ин асар асоси ғоявии КПСС, тамоми партияҳои коммунистӣ, марксистӣ-лениниро ташкил медиҳанд. Ин асар бори аввал с. 1940 ба забони тоҷикӣ нашр шуд.