Обишир, чашмаи минералии обаш хунук дар водии дарёи Дижикрӯди райони Айнии вилояти Ленинобод. Чашма дар зонаи тектоникӣ (рӯғеҷаи байни ҷинсҳои палеозой — аз боло ва таҳнишастҳои мезозой — аз поён) ҷой гирифта, дебиташ 0,3 литр/сония ва ҳарорати обаш 11° Селсия аст.
Обишир ба гурӯҳи обҳои гази карбонатдор, сулфиди гидроген, силикат, гидрокарбонату сулфат, калий, магний ва натрийдор мансуб буда, ба миқдори ниҳоят кам манган, титан, волфрам, мис, сурб, бериллий, стронсий, литий, инчунин дар ҳолати ҳалшуда гази сулфиди гидроген ва дар ҳолати озод гази карбонат дорад. Оби шифобахши чашмаро барои муолиҷаи баъзе касалиҳои бадан истифода бурдан мумкин аст.