БОЛОШАҲР

БОЛОШАҲР, деҳа дар ҷамоати деҳоти Оби Меҳнати ноҳияи Рашт. Аз Болошаҳр то маркази ноҳия 24 км; роҳ асфалтпӯш. Аҳолиаш 235 нафар (2013). Нуқтаи савдои хусусӣ, чойхона-фароғатгоҳ, мактаби таҳсилоти умумии ибтидоӣ дорад. Хонандагон таҳсили минбаъдаро дар мактаби таҳсилоти умумии асосии деҳаи Шоле ва мактаб-интернати маркази ноҳия идома медиҳанд. Соҳаҳои асосии хоҷагӣ: боғдорӣ, сабзавоткорӣ, занбурпарварӣ ва чорводорӣ. Заминҳо аз чашмаи Хартез ва Обдара обёрӣ мешаванд. Аҳолӣ тақрибан дар асрхои 17-18 маскун шудаанд. Аз сабаби дар ҷойи аз ҳама баланди ҷамоат ҷой гирифтан ва сераҳолӣ будан Болошаҳр номгузорӣ шудааст. Соли 1940 аҳолии Болошаҳр то ба 170-200 хоҷагӣ расида буд. Соли 1953 мардумаш куллан ба ноҳияҳои Шаҳритузу Қубодиён кучонида шуда, деҳа беодам монда буд. Солҳои 1974-76 як қисми аҳолӣ ба Болошаҳр баргаштанд. Зодгоҳи ходими давлатӣ Маҳмадулло Холов (собиқ Раиси Президиуми Шӯрои Олии Тоҷикистон).