БОЛОХОНА, дар санъати меъморӣ хонае, ки дар болои бинои асосӣ сохта мешавад. Дар Осиёи Марказӣ Болохонаро дар болои дарвозаҳона низ месозанд. Болохона айвондор ва беайвон мешавад. Таъйиноти ҳар ду навъи он дар фасли гармо барҳаво шудани иқоматгоҳ аст. Болохона аслан дар биноҳои иқоматӣ, вале гоҳе дар биноҳои фарҳангию маъмурӣ низ (аз ҷумла мадрасаи Носирия дар Табрез, девони шоҳӣ дар Ғазна, нақорахона дар Бухоро ва ғайра) сохта мешуд. Болохонаро ҳамчун анбори хоҷагӣ низ истифода мебаранд. Нигар низ Хона.