БОЙМАТОВ Камолиддин Ҳамроевич (24.6.1950, деҳаи Домбраи ноҳияи Восеъ – 4.2.2006, Душанбе), риёзидони тоҷик, академики АИ Тоҷикистон (2001). Хатмкардаи факултаи механикаву математикаи Университети давлатии Маскав ба номи М. В. Ломоносов (1971), солҳои 1971-74 аспиранти ҳамин университет буд. Соли 1974 рисолаи номзадӣ ва соли 1982 рисолаи докториро дар мавзӯи «Асимптотикаҳои спектралии операторҳои дифференсиалӣ ва теоремаҳои ҷудокунӣ» ҳимоя намуд. Аз соли 1974 то охири ҳаёт дар Институти математикаи АИ Тоҷикистон кор кардааст (солҳои 1981-86 муовини директор; 1986-2006 мудири шуъба). Таҳқиқоти илмии Бойматов ба назарияи спектралии операторҳои дифференсиалӣ ва псевдодифференсиалӣ, назарияи масъалаҳои вариатсионӣ барои муодилаҳои таназзулёбандаи эллиптикӣ, назарияи масъалахои канорӣ барои низоми таркибии муодилаҳои дифференсиалӣ, назарияи масъалаи Коши барои низоми муодилаҳои параболавӣ ва ба назарияи ҷудошавии операторҳои дифференсиалӣ бахшида шудаанд. Тарзи нави сохтани функсияи Грини муодилаҳои таназзулёбандаи параболавиро пешниҳод намуда, ба воситаи он формулаҳои асимптотики барои функсияҳои тақсимшавии спектри синфи васеи операторҳои дифференсиалӣ ва псевдодифференсиалиро ҳосил намуд. Усули ба истилоҳ «ошуби операторҳои дифференсиалӣ бо потенсиалҳои сингулярӣ»-ро кор карда, ба воситаи он масъалаи спектралии навъи Гасимов-Костюченкоро барои синфҳои гуногуни операторҳои дифференсиалӣ ҳал намуд. Коршоямии усули тауберии таҳқиқи асимптотикаи спектралии операторҳои дифференсиалиро дар ҳолати зарибхои ғайрисуфта исбот намуд. Бойматов муаллифи зиёда аз 150 мақолаи илмӣ мебошад, ки қисми зиёди онҳо ба забони англисӣ тарҷума ва нашр шудаанд. Таҳти роҳбарии Бойматов 14 нафар рисолаи номзадӣ ва 2 нафар рисолаи докторӣ дифоъ намудаанд.
Tags Шахсони машҳур
Инчунин кобед
САФОЛ
САФОЛ, маснуот ва ашёест, ки дар натиҷаи ба ҳам омехтани гилмоя, хамираи минералҳо, оксидҳо ва …