БОЪ, қулоч, воҳиди қадимии дарозӣ, фосилаи байни ду дасти кушодаи марди миёнақомат аз нӯки ангӯштони миёна. Дар маъхазҳои форсӣ ба шакли «боз», «боза», «бож» ва «вишмор» («вишмори шоҳӣ», «вишмори шопурӣ») низ омадааст. Дар китобҳои фиқҳӣ Боъ чун воҳиди масофа аст (1 фарсах = 3 мил; 1 мил = 1000 Боъ).
То ислом арабҳо Боъро баробари 4 зироъ ё 8 ваҷаб ё 96 ангушт ба кор мебурданд. Ҳар ваҷаб баробари 12 ангушт, ҳар ангушт баробари 1,925 см буд ва дар натиҷа Боъ баробари 184,8 сантиметр мешавад. Дар Мисри асримиёнагӣ Боъ чун ченаки расмии дарозӣ баробари 4 зироъ истифода шуда, дар асоси «зирои шаръӣ» (49,875 сантиметр) ё «зирои барид» (49,875 сантиметр) ба 184,8 сантиметр, «зирои наҷҷорӣ» (77,5 сантиметр) ба 310 сантиметр, «зирои шоҳӣ» (66,199 сантиметр) ба 264,8 сантиметр баробар буд. Арабҳо барои андозагирии дақиқ ченаки баробари Боъ – «қома»-ро истифода мекарданд (1 кома = 2 қадам = 4 зироъ). Дар Эрони бостон Боъро «ораши бузург» ё «шоҳораш» меномиданд. Ченакҳои ба Боъ мушобеҳ «фатом»-и англисӣ (182,88 сантиметр), «туаз»-и фаронсавӣ (194,9 сантиметр), «оргия»-и юнонӣ (185,1 сантиметр) ва «маховая сажень»-и русӣ (177,8 сантиметр) мебошанд.
М. Халов.