АБУЛҲАСАН АҲМАД ибни ал- Муаммал (соли таваллуд ва вафот номаълум), адиб, шоир ва мутарҷими арабизабон (нимаи дуюми асри 10-ибтидои асри 11). Мувофиқи маълумоти Саолибӣ («Ятимат-уд-даҳр») дар назди сипаҳсолор Фоиқ ал-Хосса (вафот 999) чун дабир хидмат мекард ва шеър ҳам мегуфт. Аз манбаъҳо 32 байти ӯ дастрас гардидааст (қасида дар мадҳи вазири Сомониён Абунасри Абузайд мақтул дар соли 997; пораҳои ҳамриёт ва фахриёт).
Ҳунари дигари Абулҳасан Аҳмад тарҷумаи ашъори шоирони форс-тоҷик ба забони арабӣ будааст. Саолибӣ ду байта Рӯдакӣ ва ду байта Маъруфии Балхиро, ки Абулҳасан Аҳмад тарҷума карда буд, сабт намудааст.
Адабиёт: Занд М. И , Искусство перевода в таджикской поэзии X века, дар маҷмӯаи Рӯдакӣ ва замони ӯ, Сталинообод, 1958. Н. Зоҳидов.