Абдулҳақов Нусратулло (10. 1. 1930, деҳаи Сияҳлояки ноҳияи Ховалинг -2004, Душанбе), арбоби давлатӣ ва низомӣ, генерал-майори милитсия (1975). Омӯзишгоҳи омӯзгорӣ (1946) ва Институти давлатии педагогии Кӯлобро (1948) хатм карда, дар мактабҳои ноҳияи Балҷувон даресдодааст.
Котиби якуми Комитети комсомолии ноҳияи Балҷувон (1950 – 1952), мудири шӯъбаи Комитети ҳизби коммунистии ҳамин ноҳия (1952 – 1953), котиби Комитети ҳизби коммунистии ноҳияи Данғара ва котиби якуми Комитети ҳизби коммунистии ноҳияи Даштиҷум (1953 – 1954) буд.
Таҳсил дар Мактаби олии ҳизбии назди КМ КПСС (шаҳри Тошканд, 1956 -1960), раиси комиҷроияи ноҳияи Шаҳритуз (1961), котиби якуми Комитети ҳизби коммунистии шаҳри Кӯлоб (1961 – 1965), котиби КМ Ҳизби Коммунистии Тоҷикистон, муовини Раиси Шӯрои Вазирон ва раиси Комитети назорати ҳизбию давлатӣ (июл-декабри 1965), раиси Комитети назорати халқии ҷумҳурӣ (1965 – 1972), Вазири корҳои дохилии Тоҷикистон (1972 – 1980). Бо орденҳои Байрақи сурхи меҳнат, «Нишони Фахрӣ» ва медалҳо сарфароз гардидааст.